Fe-Պատկերասրահ, Երևանի Կամերային թատրոն

1994 թվականից Երևանի Կամերային թատրոնում ստեծվել է “Fe” Մշակութային համալիրը (“Ֆերրում”՝ “Երկաթ”՝ “Երևանի Կամերային թատրոն”), որի նպատակն է՝ հայկական արվեստի պրոպագանդան։

Կենտրոնի ստեղծագործական նախագծերից մեկն էլ հանդիսացավ 1994 թ. հունիսի 24-ին բացված Fe-Պատկերասրահը, որտեղ ներկայացվող արվեստագետների թվում են ինչպես արդեն հայտնի, այնպես էլ՝ երիտասարդ, սկսնակ հայ նկարիչներ և քանդակագործներ։

Fe-Պատկերասրահի գործունեության նպատակն է՝ օգնել ժամանակակից արվեստագետներին ինքնահաստատվել և ներկայացնել իրենց արվեստը հասարակությանը։

Յուրաքանչյուր էքսպոզիցիայից առաջ կազմակերպվում է շնորհանդես, որին հրավիրվում են հեռուստատեսությունը, մամուլը, նկարիչներ, քննադատներ, մայրաքաղաքի հյուրեր, դեսպանությունների ներկայացուցիչներ և ուղղակի արվեստասերներ։

Fe-Պատկերասրահը միշտ մարդաշատ է, քանի որ ցուցասրահի այցելուն է դառնում նաև Կամերային թատրոնի ներկայացումների հանդիսատեսը։

Fe-Պատկերասրահի գողտրիկ սրճարանում, բուխարու մոտ անցկացվում են զրույցներ նկարչի հետ, կազմակերպվում քննարկումներ արվեստի հարցերի շուրջ։ Այն իր բնույթով ընկերական հավաքատեղի է։

Կամերային թատրոնի Fe-Պատկերասրահում ցուցադրվել են այնպիսի արվեստագետների ստեղծագործություններ, ովքեր են՝ Վ. Պոդպոմոգովը, Ֆ. Եղիազարյանը, Վ. Նազարեթյանը, Վ. Թոքմաջյանը, Հ. Բոյաջյանը, Ռ. Առուտչյանը, Տ. Մատուլյանը, Շ. Շահիրյանը, Մ. Ուլիկյանը, Ա. Գրիգորյանը և այլոք։

Fe-Պատկերասրահի արվեստի գործերի ցուցահանդեսները արձագանք են գտնում մամուլում, հեռուստատեսությամբ, “արձագանքների գրքում“. “Իրոք, կյանքը հիասքա՛նչ է, դուք դա ապացուցեցի՛ք...” , “Շնորհակալ ենք հյուրընկալության համար, հիանալի ցուցասրահի, ջերմության, սիրո համար...”։